aThk 13:5; Am 2:11-12
bMs 9:6; 1Sa 1:11
cSp 14:10
dSp 1:3
e2, 13
f1Kh 23:13
gTp 28:3-6
hPh 80:3; 119:135
iPh 4:6; 44:3
jPh 29:11
kTp 28:10; 2Kh 7:14

Numbers 6

Nazir Mite

1TOPA in Moses tungah, 2“Israel-te hopih inla amaute kiangah: ‘Numei khat ahikeh pasal khat in a tuam vilvelin kiciamna, Nazir mi kiciamna bang TOPA tungah kikhenkhiatna a ciam nop leh, 3amah zu le a kibilh dawntheih dangte kidek pelmawh dinga zu-a kibawl zu nam le a kibilh dangte a dawn peuhmah kei ding hi. Amah in lenggah tui dawn loin, lenggah min ahikeh lenggah keu a ne kei ding hi. 4Amah Nazir zek a tan sungteng lenggui pana piang a tang ahikeh a hawng nangawn a ne peuhmah kei ding hi. a

5 “‘Amah tuam om dinga a kiciam hun sung khempeuh a lutungah mulkiatna a kitah kei ding hi. TOPA tunga a kituam koih hun a bei matengin amah a siangtho ding hi; amah in a sam a sau-in a khawi ding hi. 6TOPA tungah a tuam om hun sung tawntung misi luang kiangah a pai peuhmah kei ding hi. 7A nu, a pa, a sanggamnu, a sanggampa nangawn a sih leh amaute hangin amah le amah anin a kisuaksak kei ding hi, bang hang hiam cih leh Pasian tungah a kituamkoihna lim a lutungah a om hi. 8Amah a tuam om hun sung tawntung TOPA tunga ki-ap ahi hi. b

9 “‘Thakhatin a gei-ah mi khat a sih vata, a ki-apsa a sam a buahsak leh a kisiansuah ni-in a lu a mettol pelmawh ding hi - tua ni pen a ni sagih ni ahi hi. 10Tua ciangin a nigiat ni-in Kikhopna Puanbuk lutna-a siampipa tungah vakhu nih ahikeh kawl-vakhu no nih a paipih ding hi. 11Siampipa in khat mawhna hanga biakna le adang khat meihal biakna-in pia dinga, thoihdamna a bawlsak ding hi; bang hang hiam cih leh amah misi luang kianga a omna hangin a mawh hi. Tua ni mahin a lu a siangtho-in a ap ding hi. 12Amah a tuam om hun sungteng TOPA tungah ki-ap pelmawh dinga, khialhna hanga biakna-in kum khat a pha tuuno apa khat a paipih ding hi. Amah a tuam om laitak a buah suak ahi manin a ma-a nite a kisim kei hi.

13 “‘Hih in ama tuam om hun a bei cianga Nazir mi adingin thukham ahi hi. Amah Kikhopna Puanbuk lutna ah kipaipih ding hi. 14Tua lai-ah amah in letsongin TOPA tungah biakna pia dinga: meihal biakna dingin kum khat a pha, poina nei lo tuuno apa khat, mawhna hanga biakna dingin kum khat a pha poina nei lo tuuno anu khat, kilawmtakna d biakna dingin poina nei lo tuutal khat, 15tuate tawh an-a biakna le dawntheih-a biaknate, le silngo sawh loh anlum lawh khat - sathau kihel annel limci kibawl mohpheng, le sathau ki-tat mohnipte a pia ding hi. c

16 “‘Siampipa in tuate TOPA mai-ah pia-in mawhna hanga biakna le meihal biaknate a bawl ding hi. 17Amah in silngo sawh loh anlum tawh pia in, TOPA tungah kilawmtakna biakna-in tuutal pia dinga an-a biakna le dawntheih biakna tawh a pia khawm ding hi. d

18 “‘Tua ciangin Kikhopna Puanbuk lutna ah Nazir mi in a apsa a sam metkhia pelmawh ding hi. Amah in a sam tawi-in kilawmtakna biakna piakna nuai-a mei-ah a khul ding hi.

19 “‘Nazir mi in a ki-ap hun sunga a sam a met khit ciangin siampipa in tuutal liang huan minsa, a nih in silngo a kisawh lo mohpheng khat le moh nip khat, a khut sungah a koih ding hi. 20Tua ciangin siampipa in TOPA mai-ah vei-a biakna-in tuate a vei ding hi; tuate siangtho-a kivei a iik le a kipia a phei tawh siampipa aa hikhawm hi. Tua khit ciangin Nazir mi in a lenggahzu a dawn thei ding hi.

21 “‘Hih in ama zektan tawh kisai-a, ama piak zawh zah a piak banah TOPA tungah ama biakna-a a kiciam Nazir mi adingin ngeina ahi hi. Amah in Nazir zektan ngeina zui-in a kiciam nasa a tangtungsak pelmawh ding hi,’ ci in,” a ci hi. e

Siampi Thupha

22 TOPA in Moses tungah, 23“Aaron le a tapate tungah gen in, ‘Hih in Israel-te thupha na piak nading zia uh ahi hi. Amaute tungah: f

24 “‘TOPA in note thupha hong pia henla g
hong kem ta hen;
 25 TOPA in note tungah a maitang hong
tan henla hong hehpih ta hen: h
 26 Note lamah TOPA hong nga henla, i
lemna hong pia ta hen,’ ci in.” j

27 “Tuaci-in Isarael-te tungah amaute in ka min koih ding uh a, tua ciang in amaute thupha ka pia ding hi,” a ci hi. k

Copyright information for ZomZIV